لاہوراحتساب عدالت نے شہبازشریف فیملی منی لانڈرنگ کیس میں فردجرم عائد کردی،شہبازشریف نے صحت جرم سے انکار کردیا۔
نجی ٹی وی 92 نیوز کے مطابق احتساب عدالت میں شہبازشریف فیملی منی لانڈرنگ کیس کی سماعت ہوئی،پولیس نے شہبازشریفکو بکتر بند گاڑی میں عدالت میں پیش کیا،جس پر لیگی کارکن بکتر بند گاڑی پر چڑھ گئے ،پولیس ن لیگی کارکنوں کوروکنے کی کوشش کرتی رہی،اس موقع پر ن لیگی کارکنوں کی پولیس کے ساتھ ہاتھ پائی بھی ہوئی ۔
شہبازشریفنے کہاکہ فزیو تھراپسٹ ابھی تک نہیں ملا،میری کمر کا درد بہت بڑھ چکا ہے،آج سماعت تھی اس لئے کل مجھے ہسپتال لے گئے ،میں نے کہاکہ مجھے ایمبولینس میںلے جائیں ،مجھے بکتر بند گاڑی میں ہسپتال لے کر گئے ،مجھے تکلیف دے کر انہیں خوشی ہوتی ہے،عدالت نے کہا شہبازشریف کو بٹھا دیاجائے،پہلے ہی ان کی کمر میں درد ہے۔
احتساب عدالت نے شہبازشریف فیملی منی لانڈرنگ کیس میں فردجرم عائد کردی، شہبازشریف نے صحت جرم سے انکار کردیا، شہباز شریف نے کہاکہ میں اپوزیشن لیڈر اور بڑی سیاسی جماعت کا صدر ہوں،یہ کیس بدنیتی پر بنایا گیا ہے جس سے انکار کرتا ہوں ، شہبازشریف نے کہاکہ اعلیٰ عدالتوںنے بھی نیب پر بہت سے سوالات اٹھائے ہیں یہ ادارہ پولیٹیکل انجینئرنگ کرنے والا ہے ،آج تک نیب ہمارے خلاف کوئی بھی ثبوت پیش نہیں کر سکا ۔
نیب نے مختلف کیسز میں مجھے گرفتار کیا ،آج تک مجھ پر ایک پیسے کی کرپشن ثابت نہ ہو سکی، میں نے قوم کے کھربوں روپے 10 سال میں بچائے ،مجھ پر لگائے گئے الزامات بدنیتی پر مبنی ہیں ،میں اس قوم کاقابل فخر سپوت ہوں ،ہم نے اس خطے میں پاکستان کو آگے لے ،ہم نے بھارت کو معاشی میدان میں شکست دینی ہے
مکمل بے قصور ہوں تمام الزامات سے انکار کرتا ہوں،اپنی بے گناہی کیلئے ثبوت عدالت کو پیش کریں گے،2009 میں لاہورہائیکورٹ نے چینی کی قیمت 40 روپے مقرر کی،فیصلے سے خاندان کو نقصان ہوا مگر چیلنج نہیں کیا،فاضل جج احتساب عدالت نے کہا کہ مجھے یہ فیصلہ یاد ہے، شہبازشریف نے کہاکہ یہ کیس سیاسی انتقام کی مثال ہے اب تو اعلیٰ عدالتوں سے بھی نیب کے خلاف فیصلے تواتر سے فیصلے آرہے ہیں ۔
عدالت نے استفسارکیا کہ حمزہ شہباز آپ نے کچھ کہنا ہے ؟، حمزہ شہباز نے کہاکہ میں اپوزیشن لیڈر پنجاب اسمبلی ہوں ، نیب نے ہمارے خلاف بدنیتی سے کیس بنایا ، نیب کے لگائے گئے تمام الزامات غلط ہیں ،تمام الزامات سے انکار کرتا ہوں ، بےگناہ ہوں اپنی بے گناہی ثابت کروں گا ، آج جس گاڑی میں لایا گیا اس کی بریک نہیں لگتی دوبارحادثہ ہوتے ہوتے بچا،ہمیں کمز درد کی شکایت ہے ایسی گاڑیوں میں لایا جاتا ہے،عدالت نے شہبازشریف فیملی منی لانڈرنگ کیس کی سماعت 26 نومبر تک ملتوی کردی،عدالت نے آئندہ سماعت پر گواہان کو شہادت کیلئے طلب کرلیا۔
